FeC rexeita a decisión de Fomento de optar polo trazado Sur, porque resulta o máis gravoso e agresivo
Ferrol en Común considera que é impropio
facer unha licitación por parte dun Executivo en funcións que hipoteca o
futuro da ría e que non lle foi comunicada ao Concello por mera
lealdade institucional A formación tamén se pregunta como é que a
minsitra popular Ana Pastor, pode visitar Ferrol dúas veces en poucos
días e non atopa oco para reunirse co seu rexedor, que llo tiña
requerido semanas atrás.
Logo dun rocambolesco teatro con moitos
convidados ilustres nas dependencias de Autoridade Portuaria, e moitos
anos despois do previsto, o pasado venres 1 de abril, veu luz o
proxecto de licitación do acceso ferroviario a Caneliñas, infraestrutura
indiscutiblemente imprescindible para o desenvolvemento socioeconómico e
diversificación industrial dunha comarca esmorecida e marxinada polas
Administracións.
Enseada da Malata |
Fíxose, iso si, coa foto de rigor na que
se atopaban o conselleiro de Política Social, José Manuel Rey, e a
ministra de Fomento, Ana Pastor, que pode visitar a urbe en dúas
ocasións en poucas semanas pero non atopa oco para recibir o seu
alcalde, Jorge Suárez, ao que ven de citar en Madrid a mediados de abril
logo de varias semanas agardando unha data.
Pero sen
dúbida, o mais gravoso é que Fomento ten optado (e pese as protestas de
veciños, ambientalistas e formacións políticas como a nosa) pola
alternativa do trazado Sur, a mais económica para o Goberno central pero
a ten maior impacto paisaxístico e ambiental na nosa ría, especialmente
no viaducto que cruza sobre a ensenada da Malata sobre piares, o que
supón amputar outro anaco dunha ría xa maltreita e castigada por
sucesivos recheos e obras que alteraron o curso das correntes mariñas
afectando a produtividade do que era un magnífico viveiro de bivalvos e
crustáceos.
Variantes trazado do ferrocarril ao Porto Exterior |
Dende FeC consideramos e reiteramos que è
o trazado máis agresivo, tanto dende o punto de vista medioambiental,
económico, e paisaxístico. Coidamos que esta decisión prima os criterios
de carácter económico por enriba doutras cuestións coma o impacto
ambiental, paisaxístico ou económico para a cidade.
Esta zona sufrirá unha nova agresión, e
afectará ao equilibrio natural da zona con especies especialmente
protexidas. A ensenada da Malata pasará a estar cruzada por un viaducto
de 580 metros, que non minimiza -ao contrario do que afirma o informe
ambiental do ministerio de Fomento- o impacto nin tampouco ten en conta
os efectos sobre os bancos marisqueiros. Dende Fec non só rexeitamos
este trazado polas súas consecuencias, senón que entedemos que unha
decisión de tanto calado que pode hipotecar o futuro da cidade, senón
que sexa un goberno en funcións o que tome estas decisións, lembrando
moito a prórroga que este mismo goberno deu a empresa Ence na ría de
Pontevedra.
Engadido a todo esto temos que sinalar a escandalosa falla
de respecto institucional por parte do goberno do Estado e da Xunta de
Galicia cara esta cidade, na figura do seu rexedor, xa que a ministra
Ana Pastor negouse a manter unha entrevista co alcalde da cidade por
falta de tempo e o empraza para unha cita en Madrid a finais de mes.
Extendemos a crítica a Autoridade Portuaria, que non trasladou ao
primeiro edil da cidade e representante de todos e todas as ferroláns, a
intención de abordar o proxecto no Consello de Administración do
porto, no que tamén ten representación o Concello de Ferrol, e que soubo
dos plans de Fomento e do porto pola prensa.
POLO DEREITO A DECIDIR DAS PERSOAS E DOS POBOS
O GRUPO MUNICIPAL DE FERROL EN COMÚN PRESENTARÁ UNHA MOCIÓN RELATIVA AO DEREITO A DECIDIR DAS PERSOAS E DOS POBOS
O Grupo Municipal de Ferrol en Común, presentará no Pleno da Corporación Municipal a moción dirixida ao Pleno polo dereito a decidir das persoas e dos pobos. O 15 de decembro de 1976 celebrábase o chamado referendo sobre a Lei da Reforma Política que, asumindo a monarquía herdada do franquismo coma forma de organización política do goberno e do Estado, establecía un sistema bicameral e abría as portas á redacción dunha nova constitución.
Todos os cidadáns e cidadás que teñen hoxe menos de 59 anos non puideron participar nese proceso, do mesmo xeito que todas as persoas que hoxe teñen menos de 54 anos non puideron participar no referendo que aprobou a Constitución española do ano 1978. É dicir, máis do 69% da poboación hoxe viva non puido votar a Constitución, non puido decidir sobre a forma de Estado que esta consagra. É máis, 3 de cada 4 cidadáns que hoxe teñen menos de 75 anos tiveron que asumir unha forma de organización política do Estado decidida por outros, nun proceso de transición herdado do franquismo e tutelado militarmente. Un referendo no que se votaba o texto no seu conxunto, incluindo a forma da xefatura do Estado.
Dende FeC consideramos que é preciso abrir un debate postergado pero necesario, xa que a cidadanía ten dereito a decidir como a organización política e a forma do Estado. Consideramos esencial o dereito a decidir das persoas e dos pobos. É necesario un debate valiente, no que quede patente que hai toda unha xeración de cidadáns e cidadás que viven nun modelo político que non votaron, e polo tanto 38 anos despois da aprobación da Constitución, é preciso a discusión pública, o cuestionamento político e por suposto o dereito a decidir das persoas e dos pobos.
Propoñemos un plebiscito, entendido como a consulta que os poderes públicos someten ao voto popular directo para que aprobe ou rexeite unha determinada proposta sobre soberanía, cidadanía, etc., semella o mecanismo axeitado para que a poboación poida decidir sobre o seu futuro. Esta consulta vinculante que podería cuestionar o modelo consagrado pola Constitución do 1978, abriría a porta a un proceso constituínte no que a estrutura territorial e o dereito a decidir dos pobos que hoxe conforman o Estado, quedase garantido, posición que nós colectivamente defendemos.
Polo tanto, o Grupo Municipal de FeC presenta esta moción ao Pleno municipal co obxecto de adoptar un acordo para reclamar do Goberno do Estado e do seu Presidente a convocatoria e organización dun plebiscito no que os/as cidadáns e cidadás poidan decidir, nos próximos meses, sobre a forma de organización política do Estado, máis concretamente sobre a monarquía parlamentaria consagrada na Constitución de 1978 de xeito que, se esta é rexeitada, se inicie un proceso constituínte que regule a forma de organización política e territorial, salvagardando o dereito a decidir das persoas e dos pobos.
O Grupo Municipal de FeC presentará unha moción en apoio a personas migrantes e refuxiadas
O Grupo Municipal de Ferrol en Común, presentará no vindeiro Pleno da Corporación
Municipal unha moción dirixida ao apoio
a persoas migrantes e refuxiadas. Manifestamos a nosa solidariedade cos
milleiros de persoas que tentan entrar na Unión Europea fuxindo das guerras, a
explotación e a fame. Debido a isto, na actualidade, estase producindo o maior
movemento de poboación desde a Segunda Guerra Mundial, ante a pasividade das
autoridades europeas que non puxeron en marcha medidas para facilitar a chegada
segura e a correcta acollida destas persoas.
As situacións
creadas pola impermeabilización e o peche de fronteiras únense ao fracaso dos
plans de readmisión, poñendo en perigo a vida das persoas migrantes e
refuxiadas. Tras o tempo trascurrido, España só acolleu a 18 persoas
procedentes das cotas de reubicación e reasentamento, das 17.000 persoas
refuxiadas ás que se comprometera. Ao mesmo tempo, o espazo europeo de libre
circulación esborrállase e non deixan de medrar os discursos xenófobos en toda
a Unión Europea. O acordo entre a Unión Europea e Turquía é unha pata máis
deste modelo, e non garante de ningunha maneira a chegada segura e o
cumprimento dos dereitos das persoas que ven obrigadas a abandonar os seus
fogares; ao contrario, ponas en maior risco.
Se non se
habilitan vías de acceso legais e seguras, seguirase obrigando ás persoas a
xogarse a vida no Mediterráneo e o Exeo, onde o ano pasado morreron máis de
3.000 persoas. A recente decisión de militarizar as nosas fronteiras
marítimas con buques da OTAN non fai senón aumentar o risco ao que se enfrontan
persoas migrantes e refuxiadas.
Por este motivo,
o Concello de Ferrol adhírese á rede de cidades refuxio e préstase a
acoller persoas refuxiadas no municipio de Ferrol, en coordinación co
Goberno de España, o Goberno autonómico, a FEMP, a Unión Europea e as entidades
colaboradoras. Entre outros
puntos da devandita moción, FeC quere reiterar o ofrecemento e colaboración
como Cidade Acolledora de Refuxiados, poñendo a súa disposición as
instalacións e articular a través de Servizos Sociais a colaboración necesaria
coas entidades e institucións interesadas as políticas para a súa recepción e
acollidas. Facendo efectiva o compromiso adquirido polo goberno de España no
acollementos das persoas refuxiadas, instando a UE, aos seus estados membros e
ao Goberno de España que habilite vías legais
e seguras que garantan o acceso ao dereito ao asilo reforzando o
programas de reasentamento, activando políticas de concesión de visados
humanitarios e poñenedo en marcha novos mecanismos non militarizados de xestión
dos fluxos migratorios en Europa, e polo tanto en España, abordando as causas
que provocan os desprazamentos forzados.
Refuxiados sirios esperan na súa fronteira cruzar a Turquía |
Nesta moción defendemos
tamén que é preciso eliminar a esixencia do visado de tránsito para aquelas
persoas que procedan de países en conflito e facer realidade a Directiva
Europea de Protección Temporal activando o mecanismo contemplado para facer
fronte a emerxencias humanitarias.
FeC presentará unha moción dirixida ao pleno relativa a declaración do Concello de Ferrol oposto á aplicación do Tratado Trasantlántico de Comercio e Investimento (TTIP).
O Acordo Trasantlántico para o Comercio e a Inversión
(coñecido polo acrónimo en inglés TTIP) é un tratado que se está a negociar na
actualidade entre os EEUU e a UE para, supostamente incrementar o comercio entre ambos asinantes,
pero que beneficia claramente a EEUU, xa que o dito tratado supón reducir as
barreiras arancelarias co obxectivo de “mellorar a competitividade e o
emprego”. Para iso, poñeríanse en marcha basicamente catro iniciativas
(harmonización normativa, nova arquitectura política e xurídica entre empresas
e institucións públicas, rebaixa de aranceis, marco favorábel á privatización
de servizos) que, de se aprobaren, alterarían fondamente as regras de xogo
básicas do estado social e de dereito europeo.
Os antecedentes deste acordo están no ano 2013 |
Este acordo busca establecer medidas que favorezan aos
investidores, limitando a capacidade das Administracións Públicas para adoptar
políticas nas áreas de saúde pública, medio ambiente e protección social e
laboral xerando un organismo “independente”
que supervisará todas as regulamentacións e
e actos normativos da UE e os
Estados membros. Isto supón un asalto á soberanía dos estados e á democracia
tanto a nivel central coma municipal cedendo poder a favor dos lobbies empresarias que terán a
capacidade de influír e modificar a lexislación actual e futura.
É aquí onde temos que falar das famosas ETN como actor
internacional que permitiría a empresas trasnacionais acumular un poder
económico sen precedentes con capacidade para obrigar aos gobernos chegando a
alterar os logros do estado social e de dereito dos estados membros.
Dende FeC entendemos que o TTIP xera un marco de
inseguridade xurídica e desprotección dos cidadáns fronte aos grandes complexos
empresarias xa que pon o acento na necesidade de harmonizar os marcos
regulamentarios de EUA e UE, de maneira que se elimine todo atranco aos
negocios. Propón que os tribunais arbitrais do Dereito Corporativo Global sexan
os que rexan as relacións entre institucións públicas e ETN de UE e EUA, co
obxectivo de que se garanta a seguridade xurídica aos seus negocios fronte ás
políticas públicas e aos dereitos humanos.
Grandes mobilizacións en toda Europa en contra do TTIP |
Tribunais de arbitraxe independentes
que dependen das grandes empresas trasnacionais. Isto quere dicir que
compromete a facultade dos representantes elixidos para administrar libremente
as súas comunidades locais e promover as actividades industriais, o emprego e
as iniciativas locais de toda índole.
Entender ademais que a supresión da barreiras
arancelarias pode supoñer efectos
negativos para algúns sectores como agricultura ou mesmo a supresión de certas
barreiras a explotación, comercialización e extensión dos OMG, cunha regulación
mais laxa nos EEUU. Feito posible de abriren os mercados europeos aos alimentos
e materias primas de EUA.
Se ademais se fixese baixo unha converxencia
regulamentaria á baixa en termos de normativa sanitaria, ambiental ou das
denominacións de orixe, e se por riba as ETN puidesen denunciar ás institucións
públicas que regulen fronte ao seu dereito a acceder aos mercados, isto tería
unhas consecuencias moi negativas non só para as pequenas economías, para os
pequenos produtores, ou tamén para certas empresas e produtos actualmente
consolidados, por exemplo no ámbito dos produtos ecolóxicos.
Pero tamén falamos da educación superior supeditando esta
a intereses económicos, atacando a sustentabilidade das universidades públicas,
cos prexuízos que tería para a igualdade de oportunidades e o acceso universal
á educación, facendo desta un privilexio e non un dereito.
Dende FeC entendemos que esta maior liberalización das
relación comerciais EUA- UE tal como está entendida implicaría unha rebaixa dos
estándares de dereitos dos cidadáns europeos e estadounidenses, é dicir, das
persoas dos consumidores/as e dos traballadores/as, así como a protección do
medio ambiente ou sobre alimentación enfrontándose aos beneficios das
corporacións locais.
O TTIP non exclúe da negociación os servizos públicos, xa
que existe a posibilidade de que tamén sexan incluídos. En todo caso, e sen
facer unha mención explícita destes, favorécense as presións para a súa
privatización mediante o establecemento das estruturas de converxencia
regulamentaria e de Dereito Corporativo antes sinaladas. Persegue a
liberalización total dos servizos públicos e abertura da prestación dos mesmos
por parte das ETN o que atacaría de fronte un piar fundamental do Estado de
Benestar, xa bastante vilipendiado por mor da crise económica.
Sumando a iso esta a opacidade coa que a Unión Europea e
os Estados Unidos están a negociar este tratado, unha opacidade e falta de transparencia que
que caracterizou este proceso desde que a Unión Europea (UE) e os Estados
Unidos de América (EUA) o puxesen en marcha en xuño de 2013.Entendemos que a aprobación do TTIP altera as regras do
xogo democrático e permite en Europa a ofensiva total do neoliberalismo
conservador xa que restrinxe a democracia e a autonomía local, suprime as
competencias dos servizos públicos locais,
e abre a porta a privatización dos servizos públicos que pasan a ser
xestionados por grandes corporacións trasnacionais, perante aos que os cidadáns
estarían desprotexidos.
As consecuencias do TTIP |
Fec entende que este tratado suporía por tanto, a
mercantilización absoluta das novas vidas e o sometemento total da soberanía
dos estados aos intereses das grandes corporacións. Consideramos vital alzar a
nosa voz contra este ataque aos nosos dereitos e liberdades, pero sobre todo a
perversión da democracia, na que serían os lobbies empresarias e as grandes
empresas transnacionais as que acumularían o total do poder político, económico
e social, nas que os cidadáns e as cidadás estarían nun espazo de desprotección
total en todos os ámbitos, dende o acceso aos servizos públicos de calidade
como a seguridade alimentaria ou a regulación consumidora.
É por todo isto que entendemos necesario presentar unha moción
dirixida ao pleno relativa a declaración do Concello de Ferrol en oposición á
aplicación do Tratado Trasantlántico de Comercio e Investimento (TTIP).
Suscribirse a:
Entradas (Atom)